Vendi ku jetoni mund të ndikojë në mënyrën se si plaket trupi juaj. Sipas një studimi të publikuar në revistën Nature Medicine, Danimarka është vendi evropian ku njerëzit plaken më ngadalë, falë kushteve të favorshme mjedisore, sociale dhe politike.
Studimi analizoi më shumë se 160 mijë persona nga 40 vende, duke përdorur inteligjencën artificiale për të krahasuar moshën biologjike me moshën kronologjike. Rezultatet treguan se banorët e Danimarkës janë mesatarisht 2.35 vjet biologjikisht më të rinj se mosha e tyre reale. Pas saj renditen Holanda dhe Finlanda.
Nga ana tjetër, Egjipti rezultoi vendi me plakjen më të shpejtë, ku njerëzit janë mesatarisht 4.75 vjet biologjikisht më të vjetër se mosha e tyre.
Sipas studiuesve, cilësia e ajrit, niveli i barazisë sociale, statusi ekonomik dhe stabiliteti politik ndikojnë ndjeshëm në procesin e plakjes. Ata theksojnë se njerëzit që plaken më shpejt biologjikisht kanë më shumë gjasa të përballen me probleme shëndetësore dhe rënie të aftësive njohëse.
Megjithëse studimi nuk provon një lidhje shkak-pasojë, ai tregon se investimi në shëndetësi, arsim dhe kushte më të mira jetese mund të ndihmojë në një plakje më të shëndetshme.