Së fundmi, në media dhe rrjete sociale kanë qarkulluar pretendime që lidhin këngëtaren Xhensila Myrtezaj me një skemë të dyshuar të pastrimit të parave. Sipas këtyre aludimeve, të ardhura nga aktivitete të paligjshme dyshohet se janë riinvestuar përmes blerjes së një qendre dermoestetike në zonën e Liqenit të Thatë në Tiranë, konkretisht subjektit “Silabel”, i lidhur me këngëtaren.
Pas përhapjes së këtyre lajmeve, Xhensila ka reaguar publikisht përmes një deklarate në llogarinë e saj në Instagram, duke i mohuar kategorikisht këto pretendime. Ajo është shprehur se publikimet e bëra ndaj saj janë të pavërteta dhe se kanë keqinformuar opinionin publik.
Në reagimin e saj, këngëtarja ka theksuar se nuk është pjesë e asnjë procedure hetimore nga institucionet e drejtësisë.
“Sqaroj qartë se nuk jam subjekt i asnjë hetimi nga SPAK”, ka deklaruar Xhensila, duke shtuar se çdo pretendim i kundërt është i pabazuar dhe dëmton figurën, dinjitetin dhe reputacionin e saj.
Në fund të deklaratës, ajo u ka bërë thirrje mediave që të tregojnë kujdes dhe të verifikojnë informacionet përpara publikimit të tyre.
Këngëtarja ka bërë gjithashtu të ditur se për çdo publikim që cenon emrin dhe imazhin e saj përmes informacioneve të pavërteta, do të ndjekë rrugët ligjore për mbrojtjen e reputacionit të saj.
