Të ecësh zbathur është një nga ato gjëra për të cilat gjithmonë kemi dëgjuar: “mos e bëj”, “do të ftohesh”, “nuk është mirë për shëndetin”.
Por në fakt, studimet sugjerojnë të kundërtën. Në vende të sigurta, ecja zbathur mund të ketë disa përfitime për trupin.
Ecja zbathur shpesh lidhet edhe me konceptin e grounding, ideja që kur prek tokën direkt (zbathur në bar, rërë, det), trupi lidhet me ngarkesat elektrike të tokës dhe kjo supozohet të ketë efekte pozitive në shëndet (si ulje e inflamacionit, përmirësim gjumi, etj.).
Përfitimet fizike të ecjes zbathur janë pranuar nga shkenca dhe lidhen me mënyrën si lëviz dhe funksionon trupi.
1. Ndikon pozitivisht në qarkullimin e gjakut
Një nga përfitimet është përmirësimi i qarkullimit të gjakut. Sipas studimeve, ecja zbathur mund të ndihmojë në uljen e viskozitetit të gjakut, çka lidhet me një rrezik më të ulët për probleme kardiovaskulare (viskoziteti i gjakut është trashësia dhe ngjitshmëria e gjakut, që ndikon drejtpërdrejt në lehtësinë e rrjedhjes nëpër enët e gjakut dhe shëndetin kardiovaskular.)
2. Rrit ekspozimin ndaj dritës natyrale
Kur ecni zbathur, shpesh jeni më të prirur të qëndroni në natyrë. Kjo ndihmon në përthithjen e vitaminës D nga dielli, e cila është thelbësore për kockat dhe sistemin imunitar.
3. Përmirëson posturën
Ecja zbathur e lejon trupin të lëvizë në mënyrë më natyrale. Këpucët shpesh e kufizojnë lëvizjen dhe ndikojnë në mënyrën si shpërndahet pesha e trupit, ndërsa pa to, qëndrimi bëhet më i balancuar dhe më i drejtë.
4. Ndikon te përqendrimi dhe kujtesa
Disa studime sugjerojnë se ecja ose vrapi zbathur mund të ndikojë pozitivisht në funksionet njohëse. Kur ecni zbathur, jeni më të kujdesshëm me hapat, gjë që aktivizon më shumë trurin dhe përmirëson përqendrimin.
5. Mund të lehtësojë dhimbjet e shpinës
Këpucët e parehatshme shpesh shkaktojnë tension dhe dhimbje në shpinë. Ecja zbathur ndihmon në forcimin e muskujve të këmbëve dhe përmirëson qëndrimin, duke ulur presionin në shtyllën kurrizore.
6. Është e rëndësishme për fëmijët
Për fëmijët, ecja zbathur ka një rol edhe më të rëndësishëm, sepse ndihmon në zhvillimin natyral të këmbës, në forcimin e muskujve dhe në përmirësimin e balancës. Gjithashtu, kontakti direkt me sipërfaqe të ndryshme (si toka, bari apo rëra) stimulon sistemin nervor. Kjo i ndihmon fëmijët të kenë një koordinim më të mirë dhe një bazë më të fortë për lëvizjen në të ardhmen.
Pra, nuk bëhet fjalë për të hequr dorë nga këpucët, por për të kuptuar se trupi ynë është i ndërtuar për të lëvizur natyrshëm dhe në disa raste, kthimi tek gjërat më bazike (si të ecësh zbathur) mund të ketë më shumë përfitime nga sa kemi menduar.