Në një trend që po ndryshon peizazhin e arsimit të lartë në Shqipëri, raportet e fundit tregojnë se gratë dhe vajza po dominojnë klasa dhe diplomime, ndërsa burrat po zgjedhin rrugë alternative si arsimi profesional ose puna jashtë vendit.
Sipas INSTAT për vitin akademik 2023/2024, nga rreth 28 000 studentë të diplomuar, 66% ishin gra një rritje e lehtë nga viti i mëparshëm.
Sociologët shpjegojnë se vajzat dhe gratë sot e shohin arsimin si rrugë të sigurt për të ardhmen, ndryshim ky që reflekton edhe transformimin e perceptimit të rolit të gruas në shoqëri. “E ndjejnë se e ardhmja ndryshon nëpërmjet shkollimit”, thotë Entela Binjaku.
Nga ana tjetër, burrat shpesh po e shmangin arsimin e lartë për të ndjekur rrugë më të shpejta për të siguruar të ardhura si puna praktike, emigrimi apo arsimi profesional.
Ky zhvillim ngre pyetje të rëndësishme për të ardhmen:
- Çfarë do të ndodhë me barazinë gjinore në universitete dhe tregun e punës?
- A përfaqësojnë këto të dhëna krijimin e një hendeku të ri ku burrat mbeten pas në arsimim?
- Si do të ndikojë kjo në strukturat profesionale dhe në fushat ku historikisht dominonin burrat?
Në një epokë ku shkollimi i lartë ishte dikur dominim burrash, sot po shohim një kthesë dramatike, dhe jo gjithmonë kjo është për mirë sidomos nëse arsimi i vajzave nuk pasqyrohet në mundësi reale për punësim.
Një gjë është e sigurt: universitetet po ndryshojnë, dhe me to, edhe struktura e fuqisë akademike dhe profesionale në Shqipëri.