Autoriteti i Mediave Audiovizive (AMA) ka pritur dhe organizuar forumin e 12-të të Rrjetit të Rregullatorëve të vendeve të Detit të Zi, BRAF, ku përfaqësues nga 9 vende anëtare diskutuan intensivisht mbi gjuha e urrejtjes në mediat audiovizive dhe platformat online.
Kryetarja e AMA-s, Armela Krasniqi, theksoi rëndësinë e luftës kundër këtij fenomeni dhe vlerën e shkëmbimit të eksperiencave më të mira mes vendeve. “Ndamë shembuj konkretë se si kanë vepruar rregullatorët europianë dhe të tjerë, jo vetëm gjatë debateve në transmetimet live, por edhe në kinematografi,” tha Krasniqi.
Pjesëmarrësit e lartë nga Organizata e Bashkëpunimit Ekonomik të Detit të Zi (BSEC) nënvizuan rëndësinë e qëndrueshmërisë dhe projekteve rajonale që lidhen me zhvillimin dhe inovacionin mjedisor. “Iniciativa si Agjenda Ekonomike dhe projekti ‘Blueing the Black Sea’ synojnë zhvillimin dhe qëndrueshmërinë rajonale,” tha Merve Safa Kavakci, përfaqësuese e lartë e BSEC.
Lufta kundër gjuhës së urrejtjes është një objektiv i përditshëm për AMA-n, ku përveç ndryshimeve ligjore, po punohet edhe për transpozimin e akteve të rëndësishme europiane, si Akti i Lirisë së Medias dhe Akti i Shërbimeve Digjitale (DSA). Ky proces synon të sigurojë një ambient më të sigurt për shikuesit dhe përdoruesit e mediave digjitale në Shqipëri.