Në zemër të Kryeministrisë ndodhet një nga hapësirat më unike të kryeqytetit: një kopsht ekologjik vertikal i projektuar nga arkitekti austriak Chris Precht. Dikur i menduar si hyrje qendrore për automjetet e Kryeministrisë, oborri i brendshëm mbeti i papërdorur për dekada, deri kur Kryeministri Edi Rama vendosi ta transformonte në një hapësirë të gjelbër dhe mikpritëse. Pas një faze kalimtare me një fushë basketbolli, ideja u zhvillua në një projekt inovativ që ndërthur gjelbërimin, drurin masiv të sjellë nga Austria, ujëvarat dhe elementet natyrore, duke krijuar një ambient që kombinohet me vijën e ujit dhe peshqit japonez “Koi”.
Oborri është i organizuar në pesë nivele, secili i konceptuar për takime, mbledhje ose evente, dhe i rrethuar me gjelbërim që shtrihet nga një kat në tjetrin për të krijuar një efekt vizual të veçantë. Nëpër tarraca e kënde pushimi gjenden pemë dhe bimë të përzgjedhura, ndërsa gjatë natës hapësira ndriçohet duke ofruar një atmosferë intime e elegante për pritjet zyrtare. Ky mbetet i vetmi oborr vertikal i këtij lloji në Shqipëri, i kthyer nga një hapësirë e harruar në një simbol modern dhe ekologjik të Kryeministrisë.